Congo church bomb-blasting : काँगोच्या चर्चमध्ये बॉम्बस्फोट, आतापर्यंत 17 ठार: 20 गंभीर जखमी, ISIS ने स्वीकारली स्फोटाची जबाबदारी

15 जानेवारी रोजी डेमोक्रॅटिक रिपब्लिक ऑफ कॉंगो (DRC) मधील चर्चमध्ये स्फोट झाला. यामध्ये आतापर्यंत 17 जणांच्या मृत्यूची पुष्टी झाली आहे. तर 20 जण गंभीर जखमी झाले आहेत. अल्जझीराच्या वृत्तानुसार, ISIS ने या स्फोटाची जबाबदारी स्वीकारली आहे. सरकारचे प्रवक्ते पॅट्रिक मुय्या यांनी या स्फोटामागे आयएसआयएसची सहयोगी संघटना अलाइड डेमोक्रॅटिक फोर्स (एडीएफ) असण्याची शक्यता व्यक्त केली होती.

चर्चमधील विध्वंसाचे दृश्य
कासिंदी टाऊनमधील चर्चमध्ये लोक प्रार्थनेसाठी जमले होते. यादरम्यान स्फोट झाला. प्रत्यक्षदर्शी ज्युलियस कसाके यांनी सांगितले- मी चर्चच्या बाहेरून जात होतो. त्यानंतर स्फोट झाला. मी आणि आजूबाजूचे बरेच लोक मदतीसाठी चर्चच्या आत धावले. सगळीकडे विध्वंसाचे दृश्य होते. अनेक लोक बेशुद्ध पडले होते तर अनेक जण वेदनेने ओरडत होते. अनेकांचे हात-पाय तुटून वेगळे झाले.

25 वर्षीय मासिका मकासीने सांगितले

मी चर्चच्या बाहेर तंबूत बसलो होतो. तेवढ्यात मला मोठा आवाज ऐकू आला. क्षणार्धात सगळं बदललं. काही फूट दूर बसलेल्या माझ्या वहिनीचा मृत्यू झाला आणि माझ्या पायालाही दुखापत झाली.

राष्ट्रपती म्हणाले - दोषींना शिक्षा करू
डेमोक्रॅटिक रिपब्लिक ऑफ काँगोचे राष्ट्राध्यक्ष फेलिक्स अँटोइन यांनी या जघन्य गुन्ह्याचे दोषी पकडले जातील आणि त्यांना शिक्षा होईल असे म्हटले आहे. फेलिक्स 2018 पासून काँगोचे अध्यक्ष आहेत.

UN च्या अहवालानुसार, 2022 मध्ये, काँगोमध्ये 370 हून अधिक लोकांनी ADF हल्ल्यात आपला जीव गमावला आहे. तसेच शेकडो लोकांचे अपहरण करण्यात आले आहे

काँगोचा समावेश 5 गरीब देशांमध्ये होतो
आफ्रिका खंडातील या देशात तांबे आणि कोबाल्ट सारखी खनिजे मोठ्या प्रमाणात आहेत. मात्र त्याचा लाभ तेथील लोकांना मिळू शकला नाही. दीर्घकाळ चाललेला संघर्ष आणि राजकीय अस्थिरतेमुळे देश संकटात सापडला आहे. मोठ्या प्रमाणात लोकांना स्थलांतर करावे लागले आहे. काँगो जगातील पाच गरीब देशांपैकी एक आहे. येथील 64 टक्के लोक एका दिवसात 200 रुपयेही कमवू शकत नाहीत.
 

संपादक : भरत नांदखिले. पोलखोलनामा - लोकशाहीचा चौथा आधारस्तंभ.