Chatrapati Sambhajimaharaj rajyabhishekh : छत्रपती संभाजी महाराजांचा 342 वा राज्याभिषेक दिन उत्साहात पार पडला , विविध कार्यक्रमाचे आयोजन

छत्रपती संभाजी महाराज यांच्या राज्याभिषेक सोहळ्यानिमित्त पुण्यातील डेक्कनजवळ असलेल्या छत्रपती संभाजी महाराज स्मारकाजवळ मोठी गर्दी पाहायला मिळाली. छत्रपती संभाजी महाराज यांच्या राज्याभिषेक सोहळा दिमाखदार साजरी व्हावा यासाठी विश्व हिंदू मराठा संघाकडून मोठ्या कार्यक्रमाचे आयोजन करण्यात आलं होतं.

यावेळी छत्रपती संभाजी महाराजांच्या पुतळ्याला एक भव्य आहार अर्पण करण्यात आला. तसेच परिसराला आकर्षक फुलांची सजावट देखील करण्यात आली होती. विश्व हिंदू मराठा संघाकडून या सोहळ्यासाठी पुष्पवृष्टी तसेच भंडाऱ्याची उधळण करण्यात आली.  

पुणे शहर राष्ट्रवादी काँग्रेस पार्टीच्या वतीने या राज्याभिषेकदिनाचे औचित्य साधत डेक्कन येथील छत्रपती संभाजी महाराजांच्या पुतळ्यास तब्बल 30 फुटी पुष्पहार अर्पण करण्यात आला तसेच शहरातील सर्व प्रमुख रस्त्यांवर छत्रपती स्वराज्यरक्षक संभाजी महाराज यांना अभिवादन करणारे फलक लावण्यात आले होते. ज्यामुळे डेक्कन परिसरातील संपूर्ण वातावरण शंभूमय झाले होते.
राष्ट्रवादी काँग्रेस पार्टीचे खासदार तथा “स्वराज्यरक्षक संभाजी” या मालिकेमध्ये छत्रपती संभाजी महाराजांची भूमिका साकारणारे लोकप्रिय अभिनेते डॉ.अमोल कोल्हे व शहराध्यक्ष प्रशांत जगताप यांनी महाराजांना वंदन केल्यानंतर राष्ट्रवादी काँग्रेस पार्टीच्या पदाधिकाऱ्यांनी “स्वराज्यरक्षक” संभाजी महाराजांच्या जयघोषानांनी जयघोष करत संपूर्ण डेक्कन परिसर दणाणून सोडला होता.

डॉ.अमोल कोल्हे म्हणाले की,” सन 1681 साली, मराठा साम्राज्याचे तेजस्वी महानायक छत्रपती संभाजी महाराज यांचा राज्याभिषेक झाला होता. आज आपल्याकडून छत्रपतींच्या विचाराचे वारसदार म्हणून महाराजांचा खरा इतिहास जगासमोर मांडणे एवढी एकच माफक अपेक्षा आहे. छत्रपतींच्या विषयांमध्ये कोणीही राजकारण आणण्याचा प्रयत्न करू नये”

प्रशांत जगताप म्हणाले की, स्वराज्य रक्षक छत्रपती संभाजी महाराज यांच्या बाबत आमचे नेते आदरणीय अजितदादा पवार यांनी आपली भूमिका स्पष्टपणे मांडली आहे. केवळ राष्ट्रवादी काँग्रेस पार्टीचा पदाधिकारी म्हणूनच नाही तर छत्रपती शिवाजी महाराजांची स्वराज्यभूमी असणाऱ्या महाराष्ट्राचा एक नागरिक म्हणून मी माझ्या राजाला कुठल्यातरी एका धर्मापुरते मर्यादित ठेवू इच्छित नाही. याप्रसंगी प्रवक्ते प्रदीप देशमुख,भगवान साळुंखे,संदीप बालवडकर,मृणालिनी वाणी,विजय ढाकले,काका चव्हाण, संगीता बराटे , महेश हांडे,रोहन पायगुडे, दिपक कामठे,अर्चना चंदनशिवे , शरद दबडे , आदींसह मोठ्या संख्येने पदाधिकारी उपस्थित होते.
 

संपादक : भरत नांदखिले. पोलखोलनामा - लोकशाहीचा चौथा आधारस्तंभ.