Kolhapur fire : कोल्हापुरातील गोकुळ शिरगाव MIDC मधल्या केमिकल कंपनीला भीषण आग

कोल्हापुरातील गोकुळ शिरगाव एमआयडीसीमधील सेराफ्लेक्स युनिटमध्ये आग लागली आहे. संपूर्ण कंपनी आगीच्या भक्षस्थानी पडली आहे.  कोल्हापूर शहराला लागून असलेल्या गोकुळ शिरगाव एमआयडीसीमधील सेराफ्लेक्स युनिटमध्ये भीषण आग लागली असून आगीवर नियंत्रण मिळण्यासाठी शर्थीचे प्रयत्न सुरू आहेत. प्राथमिक मिळालेल्या माहितीनुसार दुपारी तीनच्या सुमारास कंपनीमध्ये आग लागली आहे. या आगीचे धुराचे लोट राष्ट्रीय महामार्गावरून दिसत आहेत. यावरून आगीची भीषणता लक्षात येते. आतापर्यंत कोणतीही जीवितहानी झालेली माहिती समोर आलेली नाही. 

दुपारी 3 ते 4 च्या सुमारास लागलेल्या आगीवर आत्ता पर्यंतही नियंत्रण मिळवण्यात यश आलेलं नाही. त्यामुळे अग्नीशमन दलाकडून बंबच्या बंब रिकामे करत आहेत. घटनास्थळी पोलिसांचा सुद्धा मोठा बंदोबस्त तैनात करण्यात आला आहे. कोल्हापूर मनपा, विमानतळ, एमआयडीसीमधील अग्निशमन दलाचे जवान आगीवर नियंत्रण मिळवण्यासाठी प्रयत्न करत आहेत. कर्मचाऱ्यांनी दिलेल्या माहितीनुसार कंपनीत केमिकलचे बंब असल्याने आग नियंत्रणात येताना अडचणी येत आहेत.

प्राथमिक मिळालेल्या माहितीनुसार कर्मचारी पहिल्यांदाच बाहेर पडल्याचे समजते. मात्र, याबाबत अजून कोणीही अधिकृत दुजोरा दिलेला नाही. जीवितहानी टाळण्यासाठी ॲम्बुलन्स आग लागलेल्या परिसरात तैनात करण्यात आल्या आहेत. गोकुळ शिरगाव एमआयडीसीमध्ये अनेक कंपन्या आहेत. आग लागलेल्या कंपनीचं Ceraflux India प्रायव्हेट लिमिटेड कंपनी असं नाव आहे. दरम्यान, त्या आग लागलेल्या कंपनीच्या शेजारीच एक पेट्रोलियम कंपनी असल्यानं मोठा धोका असल्याचं सांगितलं जात आहे. केमिकल कंपनीत आग लागल्याने इतर कंपन्यांकडे आग पसरू नये, यासाठी काळजी घेतली जात आहे.

संपादक : भरत नांदखिले. पोलखोलनामा - लोकशाहीचा चौथा आधारस्तंभ.